ಮುಂಬೈ, ಜೂ 09 (Zoom Karnataka): ವಿಶ್ವದ ಅತ್ಯಂತ ಜನಪ್ರಿಯ ಶೋ ‘ಮ್ಯಾನ್ ವರ್ಸಸ್ ವೈಲ್ಡ್‌’ ಭಾರತೀಯ ಕ್ರಿಕೆಟಿಗ ವಿರಾಟ್ ಕೊಹ್ಲಿ ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ.
ಸದ್ಯ ವಿಶ್ವ ಟೆಸ್ಟ್‌ ಚಾಂಪಿಯನ್‌ಶಿಪ್‌ನಲ್ಲಿ ಆಡುತ್ತಿರುವ ವಿರಾಟ್ ಕೊಹ್ಲಿ ಕಾಡಿನತ್ತ ಹೆಜ್ಜೆ ಹಾಕುವ ಮೂಲಕ ಹೊಸ ಸಾಹಸಕ್ಕೆ ಕೈ ಹಾಕುವ ಬಗ್ಗೆ ವರದಿಯಾಗಿದೆ. ಮುಂದಿನ ಜುಲೈ 12ವರೆಗೆ ಟೀಂ ಇಂಡಿಯಾಗೆ ಯಾವ ಮ್ಯಾಚ್‌ ಇಲ್ಲದಿರುವ ಕಾರಣ ಎಲ್ಲ ಆಟಗಾರರು ರಿಲಾಕ್ಸ್‌ ಮೂಡ್‌ನಲ್ಲಿರುತ್ತಾರೆ. ಆದರೆ ಕೊಹ್ಲಿ ಮಾತ್ರ ಬಹಳ ರೋಚಕ ಮತ್ತು ಸಾಹಸಮಯ ಮ್ಯಾನ್ ವಸ್‌ ವೈಲ್ಡ್‌ ಶೋದಲ್ಲಿ ಭಾಗವಹಿಸಲಿದ್ದಾರೆ ಎಂದು ವರದಿಯಾಗಿದೆ.
ಮುಂದಿನ ತಿಂಗಳು ಇದರ ಶೂಟಿಂಗ್‌ ನಡೆಸುವುದಕ್ಕೆ ಮುಹೂರ್ತ ಫಿಕ್ಸ್‌ ಆಗಿರುವುದಾಗಿ ಶೋನ ನಿರೂಪಕ ಬೇರ್‌ಗ್ರಿಲ್ಸ್‌ ಸುಳಿವು ನೀಡಿದ್ದಾರೆ. ಬೇರ್‌ಗ್ರಿಲ್ಸ್‌ನ ಈ ಶೋ ಅತ್ಯಂತ ರೋಮಾಂಚನಾರಿಯಾಗಿದ್ದು, ಈ ಅಡ್ವೆಂಚರ್‌ನಲ್ಲಿ ಭಾಗವಹಿಸುವವರಿಗೂ ಅಷ್ಟೇ ಧೈರ್ಯ ಬೇಕಿದೆ. ಈ ಹಿಂದೆ ಪ್ರಧಾನಿ ಮೋದಿ, ಅಕ್ಷಯ್‌ ಕುಮಾರ್‌, ರಣವೀರ್ ಸಿಂಗ್ ಮತ್ತು ವಿಕ್ಕಿ ಕೌಶಲ್ ಭಾಗವಹಿಸಿದ್ದರು.
ಡೈನಾಮಿಕ್ ಭಾರತೀಯ ಬ್ಯಾಟರ್ ಕೊಹ್ಲಿ ಓರ್ವ ಸ್ಫೂರ್ತಿದಾಯಕ ವ್ಯಕ್ತಿ, ಅವರನ್ನು ಪ್ರಪಂಚದಾದ್ಯಂತ ಜನ ಪ್ರೀತಿಸುತ್ತಾರೆ ಎಂದು ಬೇರ್‌ಗ್ರಿಲ್ಸ್‌ ಕೊಹ್ಲಿಯನ್ನು ಹೊಗಳಿದ್ದಾರೆ.
